Larunbat honetan Gasteizen, Patxi Lopez lehendakariak Gernikako Arbolaren Gurutzea domina eman zion Jose Antonio Agirre lehenengo euskal lehendakariaren alabari, eta aldi berean, ekitaldi berean, lehenengo Eusko Jaurlaritza osatu zuten sailburuen senideak ere omendu zituen. Lehendakariak adierazi zuen, bestalde, Agirreren gobernu “zabal eta elkarlanezkoa eredu historiko bat” dela, hura osatu zutenak “bakoitzaren ideologia eta ezberdintasunen gainetik, elkarrekin aritzen jakin zutelako, euren herria, autogobernua eta demokrazia defendatzeko”.
Lopez zela buru, Lehendakaritzaren atarian egin zen ekitaldian izan ziren, besteak beste: lehenengo Eusko Jaurlaritzako kideen senideak; oraingo gobernuko zenbait sailburu; Juan Jose Ibarretxe eta Carlos Garaikoetxea lehendakari ohiak, aurreko jaurlaritzetako zenbait sailburu, Eusko Kontseilu Nagusikoak barne; hiru ahaldun nagusiak, Jose Luis Bilbao, Markel Olano eta Xabier Agirre; Sabino Arana Fundazioko lehendakari eta Agirre Lehendakaria Batzordeko koordinatzaile Juan Mª Atutxa, eta Euskadiko erakunde, politikagintza eta gizarte esparruetako hainbat ordezkari.